O I Certame de Música Tradicional “Palla Mallada” celébrase coa
participación de 6 solistas e de 7 grupos

O certame, que está organizado polo Concello de Ribadumia e a
Deputación de Pontevedra, desenvolverase o domingo no Auditorio
Municipal Santa Baia

O Concello de Ribadumia e a Deputación de Pontevedra presentan
este domingo, 7 de decembro, o I Certame de Música Tradicional do
Salnés, Memorial Palla Mallada. Nesta primeira edición participarán
seis solistas e sete grupos chegados de toda a provincia de
Pontevedra.

O gaiteiro solista pode ir acompañado por ata dous
instrumentosde percusión tradicional, tamboril e bombo, mentres que
o grupo tradicional comporase, como mínimo, de dúas gaitas,
tamboril e bombo. Nos quintetos, o quinto instrumento poderá ser
unha gaita adicional, un instrumento de percusión tradicional ou algún
instrumento empregado por agrupacións tradicionais no pasado:
requinta, clarinete, etc.

O certame comeza ás 19:00 horas no Auditorio Municipal
de Ribadumia, que ten capacidade para 320 persoas. En primeiro
lugar, subiranse ao escenario os participantes na modalidade de
solistas. Durante 5 minutos interpretarán un repertorio libre, que será
valorado polo xurado do certame. A continuación, será a quenda dos
grupos, que disporán do mesmo tempo para presentar a súa proposta
musical. O xurado estará composto pola concelleira de Cultura de
Ribadumia, Lidia Álvarez; o vicepresidente da Deputación de
Pontevedra, Jose Juan Durán; e xente recoñecida pertencente ao
mundo da música tradicional: Cristóbal Pascual Pérez, gaiteiro do
grupo Ardentía; Marcos Campos Pereira, director da Banda de Gaitas
Manxadoira; e Óscar Ibáñez García, especialista en música tradicional
galega.

O premio para o gañador na
modalidade de solistas é de 1.000 euros, mentres que 1.200 euros
será para o vencedor dos grupos. Ademais, destes premios
económicos, o Concello de Ribadumia e a Deputación de Pontevedra
entregarán un agasallo a cada un dos participantes nesta primeira
edición do certame. Os gañadores de cada modalidade clausurarán o
acto coas súas actuacións.

O Certame de Música Tradicional está dedicado a José Carballa,
Palla Mallada, veciño da parroquia de Leiro e considerado como o
precursor dos gaiteiros da zona norte de Pontevedra. O seu obxectivo
do certame é promover a participación das agrupacións musicais e
culturais que están a proliferar na comarca e nos arredores, e tamén a
de músicos que non pertencen a ningunha asociación ou
agrupación.