A Consellería de Cultura e a Biblioteca Pública Antonio Odriozola
poñen en marcha un obradoiro para promover e poñer en valor a
tradición oral galega a través da improvisación e rima da regueifa.
A regueifa é unha especie de cantiga entre dúas ou máis persoas, que
escenifican unha sorte de loita verbal sobre temas variados, pero polo
xeral, con moitas doses de retranca e humor. As regueifas seguen o
esquema de copla, é dicir, son 4 versos de arte menor e rima
asonante, nas que a improvisación é esencial, polo que teñen moitas
coincidencias co que hoxe en día é o hip-hop.
O obradoiro de regueifas organizado pola Delegación Provincial de
Cultura e a Biblioteca Pública de Pontevedra, enmárcase nun
programa de iniciativas postas en marcha pola Consellería de Cultura
para poñer en valor a tradición oral e frear así o seu esquecemento.
Algúns centros de Educación Secundaria xa levan tempo organizando
concursos, así como recibindo obradoiros por parte de profesionais,
como o que agora comeza en Pontevedra.
O obradoiro, dirixido a público adulto, comezará o mércores 19 de
novembro e se desenrolará todos os mércores, de 19:00 a 20:30
horas, ata o vindeiro 17 de decembro. Os coñecidos regueifeiros Bieito
Lobariñas e Josiño da Teixeira serán os encargados de impartirlo.
Ambos acreditan unha ampla experiencia, tanto na arte da regueifa
como na faceta pedagóxica da cultura popular e oral de Galicia.
As clases constarán dunha parte teórica e outra práctica, na que se
introducirá aos participantes no esquema básico das regueifas, as
estrofas de 4 versos, así como o valor da rima e o ritmo, e a
importancia de controlar o espazo no que o regueifeiro se move.
Na parte teórica haberá tamén lugar para as audicións e introdución
nas particularidades da improvisación que se fai noutros lugares da
península, incluído Portugal, e mesmo no estranxeiro, especialmente
en países de Latinoamérica.
horario:
19 de novembro de 2008 - 17 de decembro de 2008
días da semana: mércores
19:00 - 20:30
Lugar:
Biblioteca Pública de Pontevedra Antonio Odriozola
(Fonoteca)
Alfonso XIII, 3, 36002
teléfono: 986 85 08 38
ligazóns relacionadas:
Biblioteca Pública de Pontevedra
|
