A asociación Brinquedia convoca a IV edición do Día do Peón. Logo da repercusión dos tres anos anteriores, cunha participación dunhas 12.000 persoas o ano pasado, o obxectivo é, unha vez máis, divulgar iniciativas encamiñadas á recuperación e conservación das actividades lúdicas tradicionais.Esta convocatoria non só se dirixe aos centros de ensino, senón tamén a concellos, asociacións, institucións e mesmo a colectivos galegos no exterior. Brinquedia, Rede Galega do Xogo Tradicional, sinala que a estacionalidade do xogo dos peóns vén marcada na fraseoloxía galega: os refráns "Polo San Martiño, peóns ao camiño" (11 de novembro) e "Polo Santo Amaro, peóns ao faiado" (15 de xaneiro), sitúan os próximos meses como os idóneos para botar as buxainas á rúa, que nalgúns lugares son chamadas tamén trompos ou pións. E aínda hai tamén "Polo Santo Andrés, trompos do revés" (30 de novembro), e "Pola Santa Olaia, peóns á borralla" (12 de febreiro).
Programa para o San MartiñoNeste Día do Peón, 11 de novembro, lerase un manifesto ás 12.00 e a seguir concentraranse nenas, nenos e persoas maiores, para bailaren milleiros de peóns en diferentes escolas, prazas públicas ou espazos cubertos do noso país.
Polo de agora, está confirmada a participación da asociación cultural e pedagóxica Ponte... nas Ondas!, que organiza a II Xornada escolar de Xogos Tradicionais, en que participarán 225 alumnas e alumnos, dende Galiza e Portugal.
Amais participarán os CEIP Aquilino Iglesia Alvariño (Abadín), Balaídos (Vigo), Cabanas – Salcedo (Pontevedra), Campomaior (Ordes), Couceiro Freijomil (Pontedeume), o de Carnota, o de Cervo, Frei Luís de Granada (Sarria), José María Lage (Ortigueira), Labarta Pose (Baio), o Mosteiro de Caaveiro, da Capela, o Nicolás del Río, de Cedeira, o do Bolo, o Ricardo Tobío (Muros), san Vicenzo de Vimianzo, , o Santa María das Pontes, o Torrente Ballester de Cambre, o de Sigüeiro (Oroso), o Vite I en Compostela, e o Xulio Camba de Vilagarcía.
Tamén o Colexio María Assumpta de Noia, e os CPI's Antonio Orza Couto de Boqueixón, Armando Cotarelo Valledor de Boimorto, Camiño de Santiago do Pino, Ponte Carreira de Frades e San Vicente da Baña preparan diversas actividades para este día.
