Patrick Molard, un dos máximos especialistas en gaita escocesa do mundo, dará un concerto didáctico gratuito no Campus de Vigo.
Lugar: Sala 1 Edificio Miralles Data: mércores 11/04/2012 Hora : 16:30 h
Patrick Molard está considerado como un dos máximos representantes de gaita escocesa no mundo. Iniciou os seus estudos de gaita en 1965 en Saint Malo e logrou un gran prestixio ao formar parte do grupo de Alan Stivell. O gaiteiro é un dos responsables directos do rexurdimento da música bretona cunha longa traxectoria na que integrou numerosos grupos (Satanazet, Ogham, Gwendal, Pennou Skoulm, Molard Trio) pero, sobre todo, con Dan Ar Bras con quen creou un excepcional dúo de gaita e guitarra.
Durante tres anos consecutivos gañou o Trofeo Macallan no Festival Intercéltico de Lorient (1980, 1981, 1982), na Bretaña. Desde 1993 forma parte do colectivo Mestres Solistas Europeos de Gaita, compartindo escenario con outros grandes solistas como os irlandeses Micheal O´Brien e James O’ Brien-Moran, os escoceses Rory Campbell e Fred Morrison, os galegos Xosé Manuel Budiño, Anxo Pintos e Carlos Lorenzo, ou o asturiano Hevia, entre outros.