Organizado pola Dirección Xeral de Xuventude e o Grupo Correo
Gallego, fomenta a creatividade entre os músicos novos
O gañador do X Certame Folk Radio Obradoiro
recibirá un premio en metálico de 1.500 euros
Os grupos teñen de prazo até o 31 de decembro para enviar as
súas maquetas. A gala final será o 22 de xaneiro
Fomentar a creatividade músical e dar unha oportunidade aos
músicos novos. Co mesmo espírito co que se creou hai unha década, hoxe presentouse o X
Certame Folk Radio Obradoiro, organizado conxuntamente pola Dirección Xeral de Xuventude
e Radio Obradoiro, e que ao longo da súa xa dilatada traxectoria converteuse nun certame
polo que pasaron os principais grupos que hoxe conforman o panorama folk galego.
Todos os grupos que desexen participar nesta edición do certame deberán enviar as súas
maquetas antes do 31 de decembro á sede central de Radio Obradoiro, podendo consultar as
bases en www.radioobradoiro.com/folk. O gañador do certame, que recibirá un premio en
metálico de 1.500 euros, coñecerase na gala que se celebrará o 22 de xaneiro no Teatro
Principal de Santiago, que todos os anos rexistra un cheo absoluto para presenciar as
actuacións en directo do catro finalistas.
O director xeral de Xuventude, Ovidio Rodeiro Tato, destacou hoxe na presentación no Club
Internacional de Prensa, o feito de que este certame xurdise da iniciativa de dous mozos que
en 1999 apenas superaban os 20 anos: María José Gómez e Paulo Gacio, que contaron co
apoio de Radio Obradoiro. “Unha idea que foi apoiada por unha empresa privada, como o
Grupo Correo Gallego, para recuperar a música tradicional galega e manter a galeguidade”,
explicou
Ovidio Rodeiro destacou que neste certame “valórase a música folk e foméntase a
creatividade”, xa que os grupos que desexen participar no certame terán que entregar unha
maqueta con 3 temas, dos que “dous teñen que ser inéditos”. Ademais, o catro grupos que se
clasifiquen para disputar a final terán que “tocar en directo dous temas tamén inéditos”, que
non teñen porqué coincidir cos presentados previamente na maqueta. Rodeiro Tato sinalou
que a Dirección Xeral de Xuventude decidiuse a apoiar e coorganizar o X Certame Folk, que se
celebra no Ano Europeo da Creatividade, polo feito de que a música folk, até o momento, non
estaba contemplada no Certame Galego de Creadores Novos. “A Dirección Xeral de Xuventude
marcouse como un dos seus obxectivos para esta lexislatura a promoción e a difusión da
creatividade xuvenil”, e este certame encaixa neste obxectivo explicou Ovidio Rodeiro.
O director de Radio Obradoiro, José Antonio Pérez, resaltou o éxito que durante este dez anos
tivo o Certame Folk, que “foi promovido por dous mozos compoñentes de Radio Obradoiro
(María José Gómez e Paulo Gacio) e que nesta década supuxo a primeira oportunidade para
moitos grupos que triunfaron tanto no panorama musical galego, como español e
internacional”.
Neste sentido, Paulo Gacio destacou que Quempallou (gañador de 2001) xa gravou tres discos
e chegou a ser número uno nunha radio especializada de Estados Unidos. Daniel Bellón e
Diego Maceiras (gañadores en 2006), actuaron no Festival Internacional de Lorient; Xochilmica
(2004) xa gravou dous discos e actuou en Nova York. O gañador do Certame Folk 2008, os
lucense Coanhadeira, acaban de gravar o seu segundo disco e tamén se proclamaron
vencedores dun festival estatal despois de participar no Radio Obradoiro.
Máis de 500 grupos de toda España
Nas nove edicións anteriores do Certame Folk Radio Obradoiro participaron máis de 500
grupos. Aínda que nos inicios só acudían grupos da comarca de Santiago, o prestixio do
Certame Folk foise estendendo tanto polo resto de España como por Portugal. Neste sentido,
José Antonio Pérez resaltou que grupos de Portugal, León, Asturias, Cataluña, Andalucía e, o
ano pasado, do País Vasco, participaron no Certame Folk.
Pérez Docampo resaltou que este ano o festival celébrase “dacabalo entre 2009 e 2010, para
converterse nun dos primeiros festivais de música que se celebra no Xacobeo, precisamente
nun Ano Santo que tardará moitos anos en repetirse”.
Premio de 1.500 euros
Paulo Gacio, un dos promotores do certame, explicou que nesta edición produciuse un cambio
importante respecto ao premio que recibirá o gañador do Certame Folk. “O vencedor recibirá
un premio en metálico de 1.500 euros. Fai dez anos a posibilidade de gravar o seu primeiro
disco resultaba moi atractivo para moitos grupos, pero hoxe día, cos avances tecnolóxicos, a
gravación é máis alcanzable para os músicos, e o premio en metálico resulta máis atractivo e
sérvelles para que poidan gravar as súas propias maquetas”, explicou o director do programa
“En Clave de Folk”, orixe do certame.
Neste sentido, José Antonio Pérez indicou como o certame foi fiel testemuña da evolución
tecnolóxica. “Si nos primeiros anos os grupos enviaban as súas maquetas nunha cinta de
casette, hoxe xa o poden facer nun mp3, un pen drive ou nun CD”.
Paulo Gacio sinalou que para participar, os grupos ou solistas deberán enviar unha maqueta
con 3 temas. “Non se valorará a calidade de gravación da maqueta, senón a creatividade e a
calidade da música en si”, explicou Gacio, quen sinalou que “aínda que o grupo teña uns
medios precarios para facer a gravación, mesmo nunha cinta de casette, pódese ver si a
calidade da súa música é boa. Si realmente fai boa música folk”, indicou.
Gacio sinalou que, aínda que ata o de agora, a mayoría dos compoñentes dos grupos eran
mozos, este ano as bases explicitan que só se permitirá que o 25% dos compoñentes do grupo
superan os 30 anos.
José Antonio Pérez agradeceu o apoio dos colaboradores que fan posible a celebración do X
Certame Folk Radio Obradoiro, coorganizado coa Dirección Xeral de Xuventude e Voluntariado
e que conta co apoio da Dirección Xeral de Promoción e Difusión da Cultura, Estrella de Galicia,
Amboa, Pazo Valdoviño e o Concellaría de Cultura do Concello de Santiago.
Certame Galego de Creadores Novos
Durante a súa intervención, Ovidio Rodeiro lembrou que ao Certame Galego de Creadores
Novos que organiza a Dirección Xeral de Xuventude presentáronse este ano máis de 300 obras,
no once modalidades de que dispón: teatro, artes plásticas, moda, música, relato breve,
poesía, videocreación, cómic, grafiti, carteis e deseño de xoias. “Até agora os premios que
recibían os gañadores eran en metálico, e a partir do próximo ano pretendemos que se
incrementen as posibilidades de promoción e difusión destas obras, para que os nosos
mellores artistas teñan a oportunidade real de lanzar a súa carreira, mediante a organización
de exposicións, foros de creadores, ou fomentando o intercambio de creatividade con outras
comunidades e países”.
Mañá venres, inaugúrase no Centro Comercial Compostela (O Corte Inglés) a exposición que
mostra os traballos dos finalistas en deseño de xoias e artes plásticas, avanzou Rodeiro.
|
