Resultados para:

Muiñeira
XML



   >> Iniciar Sesión  


Buscar información
sobre outro grupo / etiqueta:

[1] [2] [3] [4] [5]

Novas que incluen 'Muiñeira':


Concerto V Aniversario Traspés (Mondariz)

(texto engadido o día 20/ / 11/ / 14 )


Porque un lustro non se cumple tódolos días, queremos celebrar esta data ao grande.

O sábado 22 de novembro, ademáis de ser a nosa cea de grupo, faremos no restaurante "A Muiñeira do Xosé" (Mondariz Balneario), un concerto, a media noite, das nosas tres seccións musicais, no que esperamos que estedes todos presentes para bailar, tocar e cantar con nós!!

Sabedes que somos amigos da festa, e non queremos que esta sexa unha máis, non queremos que pase indiferente... o que queremos é montar unha boa, liala parda, e que "... mañán será sonada", por iso nos gustaría contar con tódol@s nos@s amig@s para festexar este quinquenio.

Xa sabes, o sábado próximo... FESTA RACHADA!!!!

CINCO OUTONOS XUNTOS..

...comentarios..
:: Enlace a esta nova ::



Baile 100% con Os Cempés en Narahío

(texto engadido o día 8/ / 10/ / 14 )


A A.V.V. “O Castelo de Narahío” e Os Cempés convídanvos a gozar do Baile 100% e aprender de xeito sinxelo e divertido todos os pasos nun obradoiro guiado.

O Baile 100% terá lugar o sábado 11 de Outubro de 2014 no Local da Veiga en Narahío, a partir das 19:30H.

Poderán participar persoas de todas as idades e sen experiencia. Pasodobles, valses, mazurcas, chotes, muiñeiras ou carballesas explicadas por un guía de baile nunha actividade na que a forma física non é importante, só as ganas de pasalo ben.
O Baile 100% son agarrados, soltos e bailes participativos en roda, divertidos e doados de aprender.

O obradoiro de baile comezará ás 19:30H. Prégase puntualidade para poder participar de todos os ritmos e pasos. Ás 22:00H dará comezo a gran festa do Baile 100% con Os Cempés, na que se porá en práctica todo o aprendido.

Para as persoas que participen nas dúas actividades a Asociación de Veciños “O Castelo de Narahío” convídanvos a unha saborosa merenda para repoñer forzas ao remate do obradoiro.

Músicos:
Antón Varela: Gaitas, Oscar Fernández: Zanfona e cavaquinho, Roberto Grandal: Acordeón, Serxio Cés: Canto, saxo, pandeireta, bombo e guía de baile

Colaboración:
Obradoiro: 5€
Baile 100%: 5€
Obradoiro + Baile 100% + merenda: 10€

...comentarios..
:: Enlace a esta nova ::



XV festa folc de Vilariño (Cangas)

(texto engadido o día 14/ / 8/ / 14 )


Sábado 16 de agosto a partires das 22.00h.

Comeza a noite cunha Muiñeira Colectiva (haberá obradoiro de baile no local social da aldea) na praia, ao son da peza composta no 2011 polo gaiteiro Anxo Gago para a aldea de Vilariño , que dará paso ao concerto folk, coas actuacións da Xistra, Os Cempés, O Sonoro Maxín e La Tarrancha



Organiza A. C. O Gato

Colaboran na Muiñeira Colectiva: Anxo Gago, Peis d'hos, Banda de Gaitas Tromentelo, Grupo de Danza Ximalveira, Asociación Cultural Lembranzas da Ría, Soavela e o grupo de baile de Vilariño)

...comentarios..
:: Enlace a esta nova ::



Sardiñas e música tradicional para celebrar o Santo Antonio:::
http://ouzande.blogspot.com/2014/06/sardinas-e-musica-tradicional-para.html
(texto engadido o día 13/ / 6/ / 14 )


O venres 13 de xuño celébrase en Ouzande a festa de Santo Antonio.
As actividades festivas comezan ás 21h cos actos relixiosos en honra do patrón dos animais e dos namoros.
Seguidamente, contra as 22h, no Campo da Festa dará inicio unha gran sardiñada gratuíta.

Os manxares van estar acompañados pola música de tres formacións musicais:
O Regato de Matamulleres,
Retrouso e
Recanto.

 O Regato de Matamulleres toma nome do lugar homónimo de Callobre onde naceron aló por 1995. Segundo eles mesmos afirman, fan música limpa e "á súa maneira" procurando ser eles mesmos os primeiros en se divertir no escenario para transmitilo ao público. O repertorio recolle pezas tradicionais e versións de grupos consolidados como Quempallou, Susana Seivane, Os Carunchos ou Treixadura. Algunhas pezas son de produción propia.

Retrouso é o grupo nacido das clases de gaita e música tradicional de Ouzande, xa teñen no mercado un disco co mesmo nome da parroquia "Ou". Teñen unha axenda moi apretada, sendo os animadores de numerosas festas e romarías tanto na comarca como por Galicia adiante e mesmo no estranxeito. Retrouso toca música tradicional moi mimada e moi festeira coa que consiguen que o público baile e se divirta a ritmo de xotas, muiñeiras, pasodobles, valses ou rumbas.

Recanto é o grupo de canto tradicional nacido das clases de canto da Fervenza de Ouzande. Naceron ao pé do Muíño do Rubio durante unha "noite no muíño" e pola necesidade de ter un repertorio común para cantar xuntos. Ao pouco xa estaban recibindo clases da man de Marcos Varela e en poucos meses xa se deixaron escoitar no certame de Cantos de Taberna de Pontevedra. Nos últimos meses participaron en certames como os cantos de taberna da Estrada ou Arzúa.


A festa de Santo Antonio é coñecida popularmente en Ouzande como "A Sardiñada", está organizada pola Comisión de Festas (Xunta Parroquial) e constitúe a primeira festa "de verán" da aldea.

...comentarios..
:: Enlace a esta nova ::



Obradoiro de Construción e Iniciación as Tarrañolas (Vilagarcía de Arousa)
http://www.gaiteirosgalegos.com/index.php?option=com_content&view=article&id=3092:-obradoiro-de-construcion-e-iniciacion-as-tarranolas-vilagarcia-de-arousa&catid=27&Itemid=18
(texto engadido o día 13/ / 6/ / 14 )


A Asoc. Pésdebarro organiza o Obradoiro de Construción e Iniciación as Tarrañolas que se vai realizar este sábado 14 de xuño, de 11:00 a 13:30 e de 16.30 a 19:00 no Liceo Casino de Vilagarcía de Arousa.

Neste Obradoiro, ademáis de construír as nosas propias tarrañolas, aprenderemos a técnica e execución dos ritmos básicos (muiñeira, xota, etc).

O prezo será de 8 € para soci@s da Asociación Pesdebarro e de 12€ para non soci@s. As prazas son limitadas co cal apuntádevos no correo pesdebarro@hotmail.com ou no tl.: 692646068

...comentarios..
:: Enlace a esta nova ::



PRESENTACIÓN DA ORQUESTRA DE MÚSICA TRADICIONAL GALEGA (OMTG) en A Coruña

(texto engadido o día 24/ / 5/ / 14 )


Sábado, 24 de maio, ás 19:30 no Forum Metropolitano (A Coruña)

“A educación musical debe ser social, non individual. A música acompáñanos desde que nacemos cun axóuxere ou un canto de berce até que morremos cos sinos da igrexa”

A ORQUESTRA DE MÚSICA TRADICIONAL GALEGA (OMTG) é unha proposta do profesorado da Escola Municipal de Música de A Coruña como nova agrupación do centro para o curso 2013-2014. A diferenza esencial a respecto doutras agrupacións existentes na escola é que a OMTG se crea como un “taller” aberto tanto para alumnado interno como externo á propia escola. O prezo para alumnado interno é gratuíto, e para alumnado externo hai que pagar a matrícula da escola e despois unha cuota mensal de 28 euros . A admisión na agrupación é a criterio do profesorado, precisando uns niveis mínimos instrumentais para esa admisión. A idea inicial é a de dinamizar a música tradicional na cidade da Coruña, permitindo un diálogo entre diferentes Asociacións Culturais e Escolas que a practican (tanto na cidade como en localidades próximas) e a Escola Municipal de Música, sen necesidade de que isto se interprete como unha competencia polo alumnado. En definitiva: facer unha agrupación novidosa que non compita senón que comparta a súa actividade con todas esas asociacións culturais e todo o alumnado da Escola Municipal de Música, en favor da dinamización da música tradicional na cidade.
A resposta inicial foi variada. Houbo unha participación alta por parte de alumnado do ámbito clásico e moderno da propia escola e de fóra dela. Do ámbito tradicional apuntáronse fundamentalmente como internos e externos alumnado e ex-alumnado do centro. Houbo mesmo unha petición tamén de participación desde Portugal, que se desestimou por distancia; mais tamén houbo a parte negativa: unha nula matriculación por parte dese alumnado das Asociacións que procurábamos, tal vez en parte por falta de publicidade suficiente, ou en parte por lóxica desconfianza.

Porén, conseguimos facer unha base sólida e a partir daí só foi traballar.

Que facer? Na escola tíñamos experiencias previas como a Aula Folque no ano 2002:

https://www.youtube.com/watch?v=R6CHl6oVk_c
https://www.youtube.com/watch?v=w-iERckHv_U
https://www.youtube.com/watch?v=otO9y9i_gd4

ou a longa e magnífica suite “De Galicia á Habana”, composta e dirixida por Scott Stroman no ano 2007 sobre repertorio tradicional galego:

https://www.youtube.com/watch?v=ELLY0THo5hg
https://www.youtube.com/watch?v=DGepSE8sWsc
https://www.youtube.com/watch?v=SffZDs-JRRY
https://www.youtube.com/watch?v=ufrjD8G32ws
https://www.youtube.com/watch?v=hTo2WHVyvpg
https://www.youtube.com/watch?v=S0UNWLOyb2M
https://www.youtube.com/watch?v=pfg4DzcGIOo
https://www.youtube.com/watch?v=RpbisuBHlLA
https://www.youtube.com/watch?v=0zmFJFk7aFw
https://www.youtube.com/watch?v=erk9anlzIMk

Tamén, por suposto, coñecíamos e contábamos cos exemplos de varios proxectos levados a cabo por diferentes centros dos ámbitos da música folque ou tradicional: Conservatorio de Lalín e Central Folque en Santiago, Sondeseu na E-trad e Moxenas musical galego, dirixido por Xosé Oliveira en Vigo, as bandas de Xarabal e Suevia en Ribeira e Porto do Son con Pepe Romero ao frente; ou diferentes e novidosos conxuntos instrumentais criados no entorno de conservatorios de música, como o contemporáneo combo folque do Cmus de Viveiro con David Bellas, etc…

A cuestión era: que facer agora?
En principio pretendíamos unha especie de “big band” baseada en repertorio tradicional antigo e moderno con espazos mesmo para a improvisación musical; e fuxindo un pouco do que entendemos por “folque” convencional mais, era posíbel? Dependía un pouco do tipo de alumnado que se matriculase. Efectivamente, o propio alumnado imprimiu un carácter á agrupación definindo pouco a pouco cara onde tirar: levar adiante todo e adaptado para todos convertíase en demasiado traballo ao profesorado (sobre todo sen ter clara a permanencia do alumnado e mesmo da agrupación para un próximo curso), polo que ademais dos arranxos e composicións propias, decidimos recuperar vellas e inéditas partituras de coleccións particulares, de bibliotecas dixitalizadas de todo o mundo, etc.

Comezamos a remexer e apareceron cantidade delas, moitísimas completamente descoñecidas: desde fragmentos de zarzuelas, cantos populares e recollas manuscritas antigas na propia cidade, a repertorio de compositores como Adolfo Sierra co seu “Aires d´a Festa” de 1947 (un dos grandes do tango e probabelmente de orixe galega), ou a descoñecida “Muiñeira para Orquestina Coruñesa” dun tal H. Rossy, cunha 1ª edición (e probabelmente única) de 1930. Nada mellor se adaptaba á nosa idea. Estas obras leváronnos ao convencemento, máis unha vez, de que ás veces pensamos que imos parar o mundo e o mundo nos dá mil voltas, póndonos no noso lugar.

Na procura deste repertorio xunto a outro máis moderno, da tradición ou da composición actual; conseguimos o carácter propio, a personalidade da agrupación.

A recén creada OMTG comprende, pois, unha base de músicos afeccionados e un conxunto de repertorio (aínda pequeno) que ás veces soa máis clásico e ás veces máis moderno; con pequenas seccións de cordas e de metais, de gaitas, percusión tradicional e moderna, piano, acordeóns, contrabaixo, etc. Esta base, unida á magnífica resposta por parte de músicos profesionais para unirse e colaborar, permitiu que, en poucos meses desde a súa creación, a OMTG se presente por vez primeira ante o público.

O próximo día 24 de Maio ás 19:30 no Fórum Metropolitano de A Coruña (adiantado unha hora, como non!, pola coincidencia con eventos futbolísticos) faremos a primeira presentación ao público do proxecto. Esperamos que este artigo sirva para promovelo.

Non foi nada fácil chegar até aquí, moito traballo e ilusión de varias persoas: idas, vindas. Colaboradores e alumnos que se suman a última hora, outros que teñen que abandonar. Dunhas 35 persoas que se chegaron a sumar ao proxecto en diferentes momentos até as aproximadamente 25 que nese día subirán ao Fórum.

Non sabemos nen tan sequera se a agrupación chegará a consolidarse como tal nun futuro. Dependerá de varios factores: da resposta do alumnado e do público, do apoio institucional e do propio centro, e sobre todo do ánimo do profesorado para levalo a cabo, porque implica moitísimas horas de traballo non remunerado.

Tamén o de que cumpra o seu obxectivo fundacional: o de socializar a música tradicional na cidade. Para iso estará sempre aberta a calquera iniciativa ou proposta de diálogo e colaboración con outras Escolas, Asociacións, Institucións. As aportacións serán mutuas.

...comentarios..
:: Enlace a esta nova ::



Obradoiro de Percusión Tarrañolas e Culleres (Compostela)
http://www.gaiteirosgalegos.com/index.php?option=com_content&view=article&id=2959:obradoiro-de-percusion-tarranola-e-cullerescompostela&catid=27&Itemid=18
(texto engadido o día 21/ / 3/ / 14 )


Neste obradoiro aprenderás a técnica e execución dos ritmos básicos (muiñeira, xota, etc).

Horario: Venres, 19:00 – 20:15 h.

Datas:  21, 28 de marzo / 4, 11, 25 de abril / 9, 16, 23 de maio. (Duración: 10 horas)

Imparte: Manuel Rey

Matrícula aberta ata o 19 de marzo. Número mínimo/máximo de alumnos: 8/10

Prezo: 60€ (50€ para os socios)


Lugar: Local de Cantigas e Agarimos (Santiago de Compostela)

...comentarios..
:: Enlace a esta nova ::



Os Terribles da Arousa levan ás Crechas a súa escolma de melodías tradicionais da súa comarca

(texto engadido o día 15/ / 3/ / 14 )


- Os Terribles da Arousa - Sábado 15 ás 20h30 (4€)
- O domingo o músico bretón Pierrot Rougier cociñará filloas bretoas e pinchará música para os asistentes - Domingo 16 ás 20h (de balde)

Compostela, 14 de marzo de 2014. O grupo de gaitas Os Terribles da Arousa presentan este sábado 15 na Casa as Crechas o seu último traballo, ‘O camiño do carro’ unha escolma de melodías tradicionais e populares representativas dos concellos de Vilagarcía, Vilaxoán e Carril.

Este traballo realizárono con motivo da celebración do centenario do Concello de Vilagarcía de Arousa e inclúe 14 pezas: muiñeiras, xotas, canto de nadal, pezas de charanga, melodías de moda do primeiro cuarto do século XX, etc.

‘O Camiño do Carro’ é o cuarto traballo discográfico do grupo, que fai referencia a un carreiro que atravesa os viveiros de ameixa e berberecho de Carril, visible na marea baixa. Antes publicaron ‘Os Terribles da Arousa’ (1998), ‘No ramo de Herbón’ (2002) e ‘No toldo de San Cibrán’ (2005).

Pierrot Rougier e as filloas bretoas

O músico bretón Pierrot Rougier tráenos as súas músicas e as arquifamosas filloas bretoas (crepes): as filloas salgadas de sarracenos e as filloas azucaradas de trigo, feitas nunha gran tixola chá chamada ‘bilik’. Pierrot fará as filloas en directo mentres pincha as súas cancións favoritas.

...comentarios..
:: Enlace a esta nova ::



3º Baile Assalto da ELMPG na Gentalha (Compostela)
http://www.folque.com/actualidade/axenda_det.php?id=421&lg=gal
(texto engadido o día 14/ / 3/ / 14 )


14 de marzo de 2014


Mais un Bailes Assaltos da ELMPG para Compostela. Este mes adicado especialmente aos bailes bretóns: an-dro, hunter dro, gavottes, rondes,... E haberá repaso ás danzas de outros meses (Circle Circassiene, Chapeloise, Schottish, Marzurka...) e por suposto tamén haberá muiñeiras, xotas, valses e pasodobles. Previamente ao baile, hai un obradoiro de aprendizaxe para estas danzas.


...comentarios..
:: Enlace a esta nova ::



2º Baile Assalto da ELMPG en Compostela
http://www.folque.com/actualidade/axenda_det.php?id=420&lg=gal
(texto engadido o día 4/ / 2/ / 14 )


7 de Febreiro na Gentalha

En Compostela continúan os Grandes Bailes Assaltos da ELMPG. Este mes adicado continuamos adicando atención ás danzas en roda do centro de Europa onde repasaremos o Circle Circassiene, Chapeloise e Schottish e tamén haberá tempo para aprender a bourrée a 3 tempos e Marzurka. Por suposto tamén haberá muiñeiras, xotas, valses e pasodobles. Previamente ao baile, hai un obradoiro de aprendizaxe dirixido por Pili Conde (Danzalia Mundi). O músico encargado de dirixir o palco é o mestre de violino da ELMPG, Gutier Álvarez.


+ 1 noticia relacionada

...comentarios..
:: Enlace a esta nova ::



KEPA JUNKERA RENDE HOMENAXE Á MUSICA DE GALIZA

(texto engadido o día 15/ / 11/ / 13 )


KEPA JUNKERA - GALIZA


CD 1:
1. Alalá Transfigurado con Cristina Pato
2. Muiñeira dos Pontinos con Emilio e Daniel do Pando
3. Xota da Guía con Budiño
4. Lelele con Banda das Crechas
5. Danza das Pereiras/Danza de Rubiós/Muiñeira de Mangüeiro con Leilía
6. O Pousa con Luar Na Lubre
7. Fasioren Martxea con Central O Folque
8. Canto de Monzo/Muiñeiras de Florencio con Central O Folque
9. Valse de Santa Mariña con Davide Salvado
10. O Merlo/Bizkaian Zehar/Lúa Clarea/Pagasarriko Martxea/Lévame, Lévame con Treixadura

CD 2:
1. Galizako Muiñeirak/Trikitixa Martxa con Susana Seivane
2. Maneo de Silván/Roman Urrazaren Jotea con Radio Cos
3. Agarrado de Vilar de Cabeiras con Xabier Díaz e Adufeiras de Salitre
4. Muiñeira De Valdeferreiros con Daniel do Pando
5. Terras do Norte con Os Cempés
6. Muiñeira A Cruz da Lobeira/Ruada con Os Cempés
7. Cantar dos Arrieiros/Maneo dos Barreiros de Malpica de Bergantiños con Pandereteiros de O Afiadeiro
8. Vals de Arousa con SonDeSeu
9. Rumba de Barciademera con SonDeSeu
10. Ven Bailar Carmiña/Pasodoble do Berbés (Os Morenos de Lavadores) con SonDeSeu
11. Unha Noite na Eira do trigo con Uxía
12. O Galo con Centro Galego de Barakaldo & Ceo de Sil & Alberto San Martín
13. Vals de Pazos de Merexo con Manuel Pazos de Merexo



Kepa Junkera, un dos músicos mais importantes, influintes e internacionais do momento, edita co selo galego FOL MÚSICA un dos proxectos máis ambicioso da sua carreira: un traballo discográfico rodeado das mellores formacións e artistas da actual escena tradicional de Galicia.
En “GALIZA” a trikitixa, o tradicional acordeón diatónico vasco, fóndese á perfección coas gaitas, as voces, os pandeiros, as arpas, os acordeóns... para crear un universo de música tradicional perfecto. O eixo musical GALIZA-EUSKALHERRIA tivo moitos achegamentos ao longo dos anos, pero nunca estivera tan ben representado como neste dobre álbum de KEPA JUNKERA.
“GALIZA” conta cunha presentación espectacular: un libro de 23 x 23 cm, de tapas duras, 50 páxinas con ilustracións, fotos e textos, e sairá á venda o 19 de Novembro.





Datas de presentación:

MARTES 19 DE NOVEMBRO
SANTIAGO DE COMPOSTELA
PRESENTACIÓN A MEDIOS, AMIGOS E COLABORADORES
12:30 CASA DÁS CRECHAS
Via Sacra, 3
Showcase e presentacion.
Kepa contaranos os segredos e anécdotas arredor da composición e gravación de "Galiza"

XOVES 21 DE NOVEMBRO
BARAKALDO (Bizcaia)
PRESENTACION A MEDIOS, AMIGOS E COLABORADORES
12:30- CENTRO GALEGO DE BARAKALDO
Rúa Galicia, 3
Aperitivo musical

MÉRCORES 27 DE NOVEMBRO
Centro de Artesanía e Deseño de Lugo (CENTRADE). Será ás oito da tarde, e contará coa participación de Daniel e Emilio Pando


SÁBADO 30 DE NOVEMBRO
CULTURGAL PONTEVEDRA
CONCERTO PRESENTACION "GALIZA"
21:30- AUDITORIO PAZO DA CULTURA DE PONTEVEDRA
Rua Alexandre Boveda, s/n
Artistas Invitados:Budiño, Leilía, Uxía, Treixadura, Daniel Do Pando, Davide Salvado

+ 7 noticias relacionadas

...comentarios..
:: Enlace a esta nova ::



III FOLIADA PESDEBARRO (Vilagarcía de Arousa)

(texto engadido o día 28/ / 9/ / 13 )


Este domingo 29, con motivo do comezo da nova temporada de clases, na asociación Pesdebarro celebraremos a III Foliada Pésdebarro.

Comezaremos ás 14:00 h., na Area Recreativa de Fontefría - Xiabre cun xantar, onde realizaremos entres os socios da asociación un concurso de postres.

E a continuación, a partir das 16 h., continuaremos, en Fontefría, cunha exhibición-participativa de diferentes danzas do mundo. Pésdebarro, organizador desta exhibición-participativa, quere “animar a todos, isto é familias cos fillos pequenos, adolescentes e tamén aos maiores da casa” pois as danzas serán guiadas pola profesora e os alumnos da aula de danzas do mundo da asociación Pesdebarro. A Foliada será de balde para todolos asistentes.

Entre outros moitas bailes, os asistentes terán a oportunidade de bailar valses, chotis, jotas, muiñeiras, gabots, ándro, etcétera e dar unha volta ao mundo a través dos bailes.

A Foliada pode e debe acudir todo tipo de público sen límite de idade. Tampouco se require ter coñecementos nen nocións previas sobre baile nin danza tradicional.

Dende a Asociación animamos a que os que asistan ao xantar leven cousas orgánicas,reutilizables: garfos,platos,vasos,...(intentar non levar plásticos ou papeis).

No caso de chover tanto o xantar como a exhibición-participativa farase na Praza da Peixería de Vilagarcía de Arousa.

...comentarios..
:: Enlace a esta nova ::



PARA BAILAR VEÑO EU - Curso de iniciación ao baile a través da Muiñeira no Museo do Pobo Galego (Compostela)

(texto engadido o día 7/ / 9/ / 13 )


Xornada de achegamento ao baile tradicional.
Museo do Pobo Galego
Venres, 20 de setembro de 16h00 a 19h30.

Os contidos desta xornada tratarán de achegarnos ao baile tradicional galego a través dun dos seus bailes máis representantivos, a Muiñeira, atendendo ao seu contexto social e a súa evolución. Orientada a persoas adultas sen coñecementos previos, vai estar dirixida pola educadora do Museo, Carme Campo, que conta con ampla experiencia nesta materia.

Matrícula gratuíta. Custes por materiais: gratuíto para persoas socias do Museo e desempregadas, 3€ para quen non estea en ningunha destas situacións.

Prazas limitadas. Inscrición previa antes do 17 de setembro en:
Educación e Acción Cultural
Museo do Pobo Galego
981 583 620 / deac@museodopobo.com

...comentarios..
:: Enlace a esta nova ::



Concerto de NaRúa en Vigo

(texto engadido o día 5/ / 9/ / 13 )


Venres 6 de Setembro no Ferry (Eduardo Chao, 13)
Grupo "NaRúa". Jigas, reels, muiñeiras. Violin, frauta e guitarra

...comentarios..
:: Enlace a esta nova ::



Festa-homenaxe a Pazos de Merexo en Muxí­a o Venres 16 de Agosto
http://www.blogoteca.com/malmequer/index.php?cod=124177
(texto engadido o día 16/ / 8/ / 13 )


Festa-homenaxe que lle imos armar a Pazos de Merexo o vindeiro venres en Muxía, na que el e mais o seu acordeón diatónico serán os principais protagonistas.
Será as oito do serán, no "Rincón da Baiuca", na entrada mesmo de Muxía.


Pazos de Merexo, o mestre do acordeón diatónico da Costa da Morte

No Concello de Muxía, Merexo, aldea recollida no fondo da ría, a carón da fermosísima praia do Lago. Dende sempre, xente bailadora con auténtica fame de música.
Cando era moi novo e aínda non sabía tocar, levaba o acordeón e alquilábao nos bailes que se facían nas palilladas. Fala Pazos, oitenta e seis anos, gatillando dende os doce no seu acordeón diatónico. Aquel tesouro que lle trouxera o seu pai de Buenos Aires.

No cerne da enxebreza está o cosmopolitismo. Nas primeiras décadas do século XX , os homes cruzaron o mar e Merexo estivo moito máis perto de Cuba e Arxentina que de Madrid. En Buenos Aires un tío seu mercou un acordeón. Ía deixalo alá, no barco non había moito sitio para a equipaxe. Afortunadamente o seu pai, que tamén andaba por aló, pensou no fillo.
Manuel Pazos é un talento. Pequeno de corpo, mans grandes preparadas para facer ben calquera traballo. Armar cestos, ir ás lontras e, sobre todo, para crear música. A súa verdadeira paixón dende neno: Pola noite volvía cansadiño de rozar no balume e subía directo ao faiado a serrar no acordeón.

Xotas, mazurcas, tangos, muiñeiras… Nun tempo case sen radios, sen tocadiscos, calquera melodía que escoitase axiña rexurdía nos seus dedos, a armar festa por todos os bailes e palilladas da volta.

O seu repertorio, son anacos da historia da propia Costa da Morte. Cando lle pedín unha peza lentiña, botou esta cantarea:
Heiche de dar para un manto
heiche de dar para un velo
pero non quero que durmas
na miña cama de ferro.

E comentou deseguido: Aprendinlla a Monteagudo, o alcalde republicano de Carballo. Estivo agachado na miña casa. Eu era un neno. El e máis o meu pai, a carón do lume, cantábana cada noite.
Dende a década dos cincuenta, un novo tipo de instrumento, o acordeón piano –grande e con teclas- converteuse no campión de todos os bailes. O pequeno acordeón de botóns foi quedando esquecido, incapaz en competir con tanto portento. Mais Pazos nunca pousou o instrumento, seguiu tocando nas foliadas todas de Merexo. E só calou nos anos tristes da enfermidade da súa muller. Cando ela morreu gardou definitivamente no faiado a caixa da festa.

En 1997, o seu fillo Pedro deulle unha orde inescusable. Cumpría ir a Madrid coa Manada Invencible, a gran manifestación dos gandeiros galegos contra as cotas do leite. O Paseo de la Castellana foi o primeiro escenario do seu retorno á música. Todo o camiño de volta non parou de tocar. Dende aquela non acougou.
Cada un vai a feira co que ten, tal lle comentou a Kepa Junkera no xa mítico encontro do Couto entre estes dous mestres do acordeón.
Que bien toca este hombre –dixo Kepa- me recuerda a mi abuelo. Tanto lle prestou que hai unhas semanas reclamou a súa presenza no próximo disco do vasco, dedicado integramente á música galega. Na gravación participou tamén un novo portento, Pazos pequeno, Manuel, o neto do mestre, que está a continuar a súa escola de alegría.

Nos últimos anos Pazos ten repartido moita música en moitos escenarios. O vindeiro venres, volverá tocar diante dos seus veciños, no Rincón da Baiuca, nas portas mesmas de Muxía. Manuel, o neto, tamén estará alí.

Cómpre pois botar o ajrú, que viva o acordeón da Costa da Morte !

+ 2 noticias relacionadas

...comentarios..
:: Enlace a esta nova ::



Orquestra Os Modernos na Cidade da Cultura - Ciclo: Atardecer no Gaiás (Compostela)
http://www.cidadedacultura.org/gl/evento/orquestra-os-modernos
(texto engadido o día 9/ / 8/ / 13 )


10 de Agosto
21:00
Praza central
Entrada de balde



A claridade das lámpadas de cores, o cheiro a pólvora, o arrecendo das fiambreiras...
A praza central do Gaiás converterase nun auténtico campo da festa grazas á Orquestra Os Modernos, que ofrecerán un repertorio renovado de bailes como manda a última moda: fox-trot, bolero, habanera, corrido, rumba, mazurca... sen esquecerse tampouco deses ritmos máis arcaicos e propios do noso folclore como a muiñeira ou a jota.
- Os Modernos -

...comentarios..
:: Enlace a esta nova ::



XXVI día da muiñeira e XXV día dos oficios artesáns - 3 e 4 de Agosto en Mondariz

(texto engadido o día 28/ / 7/ / 13 )



...comentarios..
:: Enlace a esta nova ::



I Xornada sobre a música tradicional: A Zanfona na música galega
http://sociedadeantropoloxicagalega.wordpress.com/2013/06/16/a-saga-organiza-a-sua-i-xornada-sobre-musica-tradicional-este-ano-o-tema-sera-a-zanfona-na-musica-galega/
(texto engadido o día 4/ / 7/ / 13 )


Continuando co seu labor a prol da investigación e da divulgación dos diferentes aspectos antropolóxicos da cultura galega, a SAGA pon en marcha a súa “I Xornada sobre música tradicional” co ánimo de axudar a divulga-los distintos apectos do que posiblemente sexa un dos máis ricos e variados folclores de Europa. Este primeiro ano adicaranllo á zanfona na música galega.

A xornada terán lugar o venres 5 de xullo a partires das 19h na Casa das campás de Pontevedra.



PROGRAMA:

19h Apertura da xornada e presentación dos participantes

19:10 Interpretación de música de zanfona a cargo de Benito Salgado. Temas: "O cantar do arrieiro" e "Historias do Cebreiro"

19:20 Relatorio: "Santalices, a zanfona, novos achádegos". Por Felix Castro e Castor Castro

20h Interpretacón de música de zanfona a cargo de David Iglesias. Temas: "O cego andante" e "San Fins de Castro"

20:10 Relatorio: "A zanfona e os cantos de cego na música popular". por Pablo Quintana

20:50 Interpretación de música de zanfona a cargo de Xandre Outeiro. Temas: "Arvolico de jazmin" (repertorio sefardí) e "Muiñeira CF53" de Aires da Terra

21h Relatorio: "Proceso de construcción dunha zanfona, selección de materiais e innovacións". Por Cesar Loureiro.

21:40 Interpretación de música de zanfona a cargo de Carmen Gallego e César Loureiro. Temas: un set de tres temas (galego, francés e sueco).

- Zanfona -

...comentarios..
:: Enlace a esta nova ::



O éxito da resistencia - XII Premios Opinión
http://mas.laopinioncoruna.es/canales/musicafolk/2013/05/24/o-exito-da-resistencia/
(texto engadido o día 25/ / 5/ / 13 )


Rodrigo Romaní, con Arpas de Breogán, fai 'dobrete' (mellor tema orixinal por Terra de Melide + mellor artista) e Luar Na Lubre levan o premio a mellor disco co seu Mar Maior

Os PREMIOS OPINIÓN fixeron un ano máis unha profunda e agarimosa defensa da música de raíz galega, do folclore da terra e da dedicación dos seus músicos por manter viva e fecunda a súa tradición sonora. O gran triunfador da tarde-noite, o mesmo Rodrigo Romaní, quen asinou un dobrete cos galardóns de mellor canción e mellor artista do ano, salientou no seu breve discurso de agradecemento que estes premios convértense “nun acto de resistencia” contra os tempos de problemas que vive o seu sector, contra a suba de impostos, lembrou, que teñen que asumir os artistas e as dificultades para interpretar a súa música en concertos.
A banda Luar Na Lubre mereceu o premio que os músicos que forman o xurado lle deron ao seu traballo Mar Maior, recoñecido como mellor disco galego de folk. A gala celebrou no teatro Rosalía os doce anos de vixencia dos PREMIOS OPINIÓN con outro galardón especial, o que recolleu o director do arquivo sonoro da Radio Galega e compositor Pablo Barreiro Rivas, o premio Andaina Senlleira.
As actuacións musicais foron o outro momento forte da gala. Comezou a formación arteixán de cantareiras Taravela, que deu mostra da súa frescura con xota, muiñeira, rumba e maneo no seu repertorio. Un grupo da Escola Municipal de Folclore de Betanzos dirixido por Pedro Lamas seguiulle con pasodobre, rumba, vals e xota. O dúo que forman Xabier Díaz e Guille Fernández convidou á escea a Carlos Álvarez, Uxía Cribeiro e Diego Calviño para dar conta de catro fermosas pezas do seu disco Arrolos de salitre (2010), unha colección de nanas ás que responderon máis dun cativo que se atopaba entre o público durmindo prácidamente nos berces dos seus pais.
O momento máis emotivo da gala, no que se fusionaron música, lembranzas, tradición, defensa do folclore galego e tamén bágoas, foi a reaparición da banda Dhais. Os seus membros levaban trece anos sen tocar xuntos sobre un escenario. E o fixeron onte para lembrar aos seus finados compoñentes César Morais e Luís Areán, dos que se falou nunha curta documental proxectada no teatro. O grupo de Lalín pechou a festa cunha actuación de 40 minutos que entusiasmou ao público, desexoso de que interpretasen máis temas, e para a que se prepararon durante sete meses.
Todos os premiados e artistas agradeceron ao xornal LA OPINIÓN a celebración destes galardóns que destacan a tradición da música galega de raíz desde hai doce anos, e en concreto ao colaborador deste diario Óscar Losada, quen volveu a estar ao frente da organización dos premios. O Concello, a Diputación, a Xunta e Gadisa tamén colaboraron.
O xornalista Moncho Lemos estreouse coma mestre de cerimonias e quiso lembrar nas súas intervencións a “toda a xente que mantén viva a esencia da música galega”. E o tamén colaborador de LA OPINIÓN Lino Braxe, moi emocionado por volver ás táboas tras sufrir un accidente traballando nunha obra teatral hai tres meses, foi o encargado de ler dous poemas dos Cantares Galegos de Rosalía de Castro.

Premiados e artistas recoñecen a aposta de LA OPINIÓN pola esencia da tradición musical galega

Na loita por facerse cos trofeos dos XII PREMIOS OPINIÓN de música folk saiu triunfadora a figura de Rodrigo Romaní, quen se impuxo, con Terra de Melide na categoría de mellor canción, a Acadacanto, Óscar Fernández e Pancho Álvarez. Ao recoller o seu recoñecemento suliñou máis dunha vez que a súa peza “non foi a mellor canción do ano”. Romaní subiu de novo ao escenario ao ser escollido polo xurado mellor artista por diante de Pancho Álvarez, Óscar Fernández e Fernando Barroso.

O premio correspondente ao mellor álbume galego de música folk do ano foi a parar a Luar na Lubre. Mair Maior mereceu mellor recoñecemento que os discos de Lois Peixoto e Fernando Barroso, Rodrigo Romaní e PeldeNoz. O xornalista e promotor musical Nonito Pereira recolleu a peza de artesanía e agredeceu, coma os demáis protagonistas da velada, a aposta de LA OPINIÓN por premiar as raíces musicais da súa cultura.

...comentarios..
:: Enlace a esta nova ::



SOTAQUE. novo disco de Xose Manuel Budiño, en Abril

(texto engadido o día 26/ / 3/ / 13 )


Gravado no seu estudio, "Ardora", e mesturado e masterizado nos estudios “Atlântico Blue Studios de Lisboa”, SOTAQUE, o novo traballo discográfico de BUDIÑO, verá a luz a finais do mes de Abril.

Datas da presentación:

19/04/13 tvg-programa Luar
25/04/13 COMPOSTELA Teatro Principal / 21:00
26/04/13 OURENSE Teatro Principal / 21:30
09/05/13 MADRID Sala Galileo
10/05/13 PONFERRADA Sala La Vaca
18/05/13 ZARAGOZA Explosivo Club
25/05/13 SANTANDER Sala BNS
APRAZADO -> 01/06/13 A CORUÑA Teatro Colón


Este traballo de composición propia reflexa a impronta da música tradicional e en especial da percusión galega, sempre tocada e pulida a man, xunto coa utilización da electrónica co ACENTO característico de BUDIÑO, co seu SOTAQUE.

Un álbum conceptual onde as diferentes gaitas, percusións e voces galegas teñen a labor de marcar o ritmo ao longo de nove músicas compostas por BUDIÑO mais unha peza tradicional, chea de sutileza e vitalidade.

Os amigos convidados ao SOTAQUE de BUDIÑO fan que na súa particular atmosfera se misturen os centos de capas percutivas utilizadas para a gravación:

* ANTÓNIO ZAMBUJO desde Portugal canta ao amor en “Déixame Adiviñar”, unha letra escrita por Carlos Blanco.

* LUIS TOSAR imprime o seu SOTAQUE cantando á vida, á saudade, na canción “Hoxe canto en Libertᔠcon letra de Celso Emilio Ferreiro.

* Os CANTAREIROS DE O FIADEIRO cantan e tocan as pandeiretas no único tema recollido da tradición galega, onde a gaita de BUDIÑO aparece mestúrase como unha voz mais do grupo de cantareiros.

* MICHAEL McGOLDRICK coa súa frauta máxica desde Manchester toca unha muiñeira, que da título ao novo traballo de BUDIÑO, SOTAQUE.
- Budiño -

+ 1 noticia relacionada

...comentarios..
:: Enlace a esta nova ::



[1] [2] [3] [4] [5]


En 'Novas Relacionadas'



* Os ´Elelelos´ de Bueu buscan mecenas - Faro de Vigo

* Pazos de Merexo, o mestre do acordeón diatónico

* O dúo de Xinzo de Limia gaña o II Concurso de Dúos do Toxos e Froles

* II Concurso de Dúos Gaita-Percusión . Organiza o decano dos coros galegos

* Maghúa pesca con Corricán un trozo de patrimonio vivo - El Ideal Gallego


(mostráronse só as últimas recibidas)
buscar mais información
sobre Muiñeira en
Ghastas Pista?

Voltar á páxina anterior

Ghastas Pista?

Falándoche de música galega dende o Século XX
info@ghastaspista.com

[ Discos ]-[ Historia..]-[ Novas ]-[ Concertos ]-[ Radio ]-[ De copas ]
[ Foro ]-[ Actualizacións ]-[ Videos ]-[ Outras ]