NOVIDADES DISCOGRÁFICAS

UNHA SEMANIÑA ENTEIRA é o cuarto traballo discográfico do grupo, continuación dos dous anteriores (Unha noite no muíño , Unha noite non é nada).Nesta ocasión, incidimos no pouso que o canto popular foi deitando na historia da música galega reivindicando, unha vez máis, a transmisión de melodías tradicionais e do noso patrimonio cultural. Xúntanse dúas concepcións ben arraigadas na música da nosa terra: o canto e a gaita , o ORFEÓN TREIXADURA e TREIXADURA GAITEIROS . A música tradicional salvagardada polos coros decanos galegos, as cantigas populares que arrouparon a gaita no século pasado, as melodías de gaita que máis prenden en nós, as novas cantigas que TREIXADURA “peneira no seu tremiñado” configuran o repertorio deste novo traballo. Gravamos UNHA SEMANIÑA ENTEIRA nos estudos A casa de tolos de Gondomar e Edisco na Estrada, a finais de 2005 e principios de 2006, coa axuda dos técnicos de son Segundo Grandío, Pablo Casal e Fernando Campos . UNHA SEMANIÑA ENTEIRA contou coa colaboración de dous grandes músicos que son, ante todo, grandes amigos nosos. “Se sobes unha tarde de bo tempo ao monte Santa Trega , poderás desfrutar do bo facer musical de Tino Baz , gaiteiro da Guarda. Foi moi perto de alí, en Camposancos , onde tivemos a sorte de atopármonos en 1999 e dende aquela, TREIXADURA e Tino Baz somos amigos e colaboradores inseparables. Tino formou parte do ORFEÓN TREIXADURA na súa primeira etapa e accedeu a gravar con nós UNHA SEMANIÑA ENTEIRA . Non podemos contar con el nos directos, pero si acudir a algún dos seus concertos en solitario para abraiarnos e emocionarnos coa súa música tradicional de gaita, guitarra, percusión, zanfona e como non, coa súa potente voz.” “ Pablo Cés , o bombeiro bombeiro , comezou a colaborar con nós nalgúns concertos durante o ano 2005, concertos nos que, ademais de regalarnos ese seu xeito tan especial de tocar o bombo, nos sorprendeu co seu ánimo, o seu optimismo e a súa enerxía no escenario. A súa traxectoria musical comezou coa fundación de OS CEMPÉS e hoxe forma parte de MALVELA e SON DE SEU .”   Este é o repertorio que escollemos para plasmar o encontro musical entre dous grupos que comparten unha mesma estética musical e que deu lugar á edición deste traballo. 1. UNHA SEMANIÑA ENTEIRA Rescatada dunha antiga gravación familiar dos Campaneiros , arranxamos esta orixinal composición súa como a nosa sentida homenaxe a un dos máis grandes grupos de gaiteiros da nosa música popular. 2. FISTERRA Este fermoso tema, mestura de varios cantos populares, soa nas voces do Orfeón Treixadura amosándonos o seu lado máis sensible, doce e inspirado. O grupo Tau de Vigo xa o interpretaba nos albores da música folk en Galiza. 3. FOLIADA DE SARELA Unha corrente de auga apaixonada, desexada, esperada no tempo e na distancia… Sarela . 4. MUIÑEIRA DO SANTO AMARO No ano 1999, Treixadura coñeceu a Tino Baz na romaría do Santo Amaro (Camposancos - A Guarda). Sirva esta melodía para selar unha amizade chea de momentos inesquecibles que perdura no tempo. 5. SE CHOVE ...deixa chover'e, se orballa, deixa orballar'e, por máis que chova e que vente, de ti non me hei de apartar'e. 6. POLCA DOS ENCANTIÑOS Os Encantiños do Umia é un veterano grupo de gaiteiros de Godos (Caldas de Reis). Do seu fecundo repertorio, arranxamos esta polca que aparece precedida, co permiso dos mestres, dunhas atrevidas variacións da melodía no acordeón. 7. ESTRELIÑA DO LUCEIRO / MIÑAS CUNCHAS Tino Baz e Mingos Lorenzo recrean un fermoso alalá que serve de preludio para unha cantiga que formou parte do repertorio dun dos coros decanos da música galega, Cantigas e Agarimos . 8. CHULA DA GUÍA Nosa Señora da Guía e Chula da Póvoa son os nomes cos que se coñece esta melodía en Galiza e Portugal. Máis alá das liñas trazadas nos mapas, esta melodía lémbranos a inmensa cultura popular que compartimos co país veciño. A segunda melodía, Mariñas de Betanzos , aparece recollida en Cantos e Bailes de Galiza de José Inzenga . 9. CANTIGA DA VENDIMA O estremeño Manuel García Matos publicou en 1960 unha recollida de campo na que figura este tema. Pertence a unha serie de melodías que coa súa interpretación facían máis levadeiros os traballos agrícolas. 10. A HERBA DA ILLA DE SAN SIMÓN A Illa de San Simón (Redondela - Pontevedra) conserva aínda a maxia e a beleza que inspiraron os trobadores medievais galegos e que os desastres da guerra non lle puideron roubar. Unha alborada pola illa bastou para que nacese parte desta melodía que nos lembrará por sempre aquela tarde. 11. ANSUÍÑA/MIÑAS COUSAS Ansuíña , illote de Vilanova de Arousa (Pontevedra), é o nome dun grupo de gaiteiros desta vila en que, dende hai anos, milita con entusiasmo o compositor da muiñeira. Miñas Cousas é a nosa versión deste tema popularizado polo Coro Cantigas da Terra e que chegou a nós a través de Ricardo Santos .   A necesidade de incluír no anterior disco un coro de voces masculinas no tema A chula de Pontevedra, deu orixe ao ORFEÓN TREIXADURA. Decidimos xuntar para esa ocasión unha serie de compañeiros que, coma nós, gustaban e gozaban do canto e dispoñían de boas voces. Este orfeón acompañounos en parte dos concertos de presentación de Unha noite non é nada . Aquela iniciativa circunstancial amosounos unha chea de posibilidades musicais e de repertorio que TREIXADURA non podería asumir sen eles. O ORFEÓN TREIXADURA está formado por dez persoas que proveñen de propostas musicais variadas e que teñen en común o gusto e o respeto pola música tradicional, motivo dabondo para que hoxe representen e dignifiquen coma ninguén este novo proxecto: UNHA SEMANIÑA ENTEIRA . Os compoñentes do ORFEÓN TREIXADURA son: Gustavo Cuntín , baixo É un fan de confeso TREIXADURA e gran amante das tertulias, sobre todo cando éstas deveñen en festa. Emana harmonía cando canta e cando fala e ,ás veces, mesmo cando non o fai. Antón Guisande , baixo Foi sempre un apaixonado da canción e da música, por iso hoxe lles dedica boa parte do seu tempo como compoñente do coro AMADEUS e como afeccionado ao acordeón. Moncho Marín , baixo Incansable estudoso da nosa música tradicional, fixo abondosos traballos de recollida e participou no grupo PALLAMALLADA. Ata hai ben pouco, formou parte do grupo de música medieval RESONET e hoxe colabora co Museo do Pobo Galego. Ramón Vázquez “O Chilro” , barítono Formou parte da primeira formación de TREIXADURA ata que decidiu dedicarse profesionalmente á construción de instrumentos tradicionais galegos. Hoxe é un dos máis prestixiosos luthiers de Galiza e gaiteiro, xunto con Xaquín Xesteira , nos FAÍSCAS DE SOLOBEIRA . Mingos Lorenzo , barítono Foi compoñente de A RODA , con quen compartiu o gusto daquela xeración pola cantiga popular nas xuntanzas de amigos, das que hoxe continúa a ser incondicional. Xosé Méndez “Morgan”, barítono O rei da Algalia de Abaixo , onde rexenta o Xa chegou , é un dos pais das estalotadas da rúa de San Pedro (que aledan as noites compostelás), membro fundador de OS ESTALOTES e compoñente de CANTIGAS E AGARIMOS . Antón Cabaleiro , tenor Leva toda a vida mergullado na música e na danza tradicionais. Entre outras moitas cousas, foi membro fundador do grupo A RODA , participou noutras formacións coma CASTAÑA , MAREIRA e PETAPOUCO e dirixiu o grupo de danza FROLES MARELIÑAS . Antón Fontenla , tenor Gaiteiro de Campolameiro , foi un dos fundadores do grupo xa desaparecido QUINTA FEIRA , unha novidosa aposta dentro da música folc galega. Delio Domínguez “o camarón da Limia” , tenor Tomou contacto co flamenco na emigración, en Alemaña , e dende aquela esta é a súa maior paixón. Como bo amante das tradicións, tamén o é da nosa música, unha música que o acompaña dende o berce na súa terra, a Limia e na súa aldea, Lampaza . Alberte Raposo , tenor Comezou a cantar na CORAL DE ARZÚA en 1979. Dende entón, non deixou de participar en toda canta foliada xurdiu e xorde entre Arzúa e Santiago , afección que hoxe compaxina coa súa participación en CANTIGAS E AGARIMOS . Se algo pretende este disco, ademais de contribuír á divulgación e normalización da música tradicional galega, é compartir o poder e a forza evocadora, máxica e reconfortante do canto colectivo. Invitámosvos a cantar con nós e co ORFEÓN TREIXADURA e que sexades partícipes desta nosa xuntanza musical que agora tamén é vosa.

XURXO ROMANI - MANDRANUGALLA (2006) A REGUEIFA PLATAFORMA www.aregueifa.net   O disco Mandranugalla (mestura de dúas verbas, catalana e galega, que definen o arte da preguiza) combina zanfona contemporánea con todo tipo de instrumentos reais e sampleados, bebendo das fontes da música tradicional galega, da música islámica, e da música medieval. A zanfona vai acompañada nos nove temas por percusións reáis e sintéticas, e todo tipo de instrumentos. Feito aínda máis destacado nos dous temas remesturados por Fanny+Alexander que figuran coma bonus tracks, remesturas electrónicas que pretenden que o instrumento saia do mundo elitista da música folk e tradicional e chegue sen complexos ao gran público. Xurxo Romaní, galego residente en Barcelona dende hai 13 anos. Gaiteiro, entusiasta da música tradicional galega, das músicas árabes, da música medieval e renacentista, autodidacta de diversos instrumentos de corda (mandolina, saz, oud, bouzouki) e adicado dende 1997 ó estudo da zanfona. Ex-compoñente do xa desaparecido grupo de música folk galaico-mediterránea Ondina Xana, compoñente do sexteto de música antiga Organistrum e colaborador doutros músicos da escea galaico-barcelonesa como César del Caño ou Míriam González. A fascinación pola zanfona vénlle dende cativo, pero como moitos outros rexeitou comezar co instrumento pola dificultade naquela época de conseguir un a un prezo razoable e coas características técnicas necesarias para sacarlle partido. No folk galego, ate hai pouco, a zanfona ten desempeñado o papel de instrumento secundario, e nos últimos anos a adopción da zanfona contemporánea, con melloras técnicas notábles, vai acompañada dunha explosión de creatividade e de novos músicos adicados a sacarlle a este milenario sintetizador medieval todo o que leva dentro. Descubre a zanfona contemporánea influido por músicos cataláns como Eduard Casals e Marc Egea, e polo luthier Sedo García, que constrúe en Catalunya zanfonas inspiradas no modelo francés. Profundiza no seu estudo en cursos coa Asociación Ibérica da Zanfona con Gilles Chabenat, Pascal Lefevre, Nigel Eaton ou Valentin Clastrier. Toca unha zanfona electroacústica construida polo luthier austríaco Wolfgang Weichselbaumer. Contacto: xurxoromani@hotmail.com / 646206294

UNHA DÉCADA CON BERROGÜETTO NOVO DISCO: 10.0 www.musicaprom.com

Berrogüetto é o nome da subversión en contra do acomodaticio e do rutineiro. É a procura dun alén no decorrer das horas de traballo honesto e sincero, na beleza agochada no trasluz da constancia. Berrogüetto é o nome da minuciosidade puntillísta, do fino encaixe de harmonía e tempo, da áxil melodía que non se contenta coa súa galanura e alza os ollos para enxergar horizontes máis azuis e máis amplos. Hai agora dez anos que estes artistas viñeron a convulsionar o mundo folk cun discurso diferente e engaiolante. A xenialidade destes músicos galegos foi quen de crear un estilo propio e inconfundible, unha escola con seguidores e imitadores, algo ó que moi poucas formacións teñen o privilexio de acceder. Niso se distinguen os grandes creadores: só eles permanecen no imaxinario colectivo dun país, revelándose continuamente tras de usos e patróns estilísticos das novas xeracións de músicos. Por se isto fora pouco, Berrogüetto vive nun perpetuum mobile, sempre cuestionándose a si mesmos, sempre inquedos no seu papel de grupo emblemático da música galega, agasallando ós seus seguidores (entre os que me atopo) con xoias musicais tan valiosas como pouco frecuentes. Con tan só tres traballos discográficos, Berrogüetto abriu novos camiños para a música folk galega. No seu décimo ano e no seu cuarto álbum, as felicitacións e os parabéns de todos os que os apreciamos. Grazas, Berrogüetto. RODRIGO ROMANÍ

INFORMACIÓN e CONTRATACIÓN www.berroguetto.com BERROGÜETTO PRODUCCIÓNS S.L. Avda. de Bilbao Nº 8,5ºB. 15706 Santiago de Compostela. A Coruña. Tel: +34 981 573 944 Fax: +34 981 557 438 E-mail: info@berroguetto.com

 

MARFUL   A música de Marful lembra aos salóns de bailes con balcóns dos anos 30-40, está inspirada neles e na introducción das primeiras jazz-band en Galiza, na súa fusión coa música folque. Ritmos bailáveis americanos e europeios: tangos, habaneras, fox, .... con letras actuais, sociais, intelixentes, inxenuas aderezadas con malicia. Marful ten actuado en Paris, Cataluña, Portugal e Galiza. Agora acaban de sacar o seu primeiro disco. O mundo ao revés: un grupo que tivo o seu clube de fans antes do seu primeiro disco: www.clubedefansdemarful.blogspot.com Máis: www.marful.info www.abada.es - contrata www.produccionesefimeras.com Ugia é unha das voces mais transgresoras e controvertidas do panorama musical galego, unha voz a contra corrente. Unha grande dose de talento e creatividade. Un animal cénico. Dirixe o Conservatorio de Música Tradicional e Folque de Lalín. Ten colaborado con músicos como Antón Reixa, Kaki Arkarazo , Gaiteiros de Lisboa, Eliseo Parra, Uxía, Guadi Galego, Cempés, Xenreira e Susana Seivane entre outros. Ten feito espazos sonoros para teatro e comparte o proxecto Nordestinas con Abe Rábade e Guadi Galego. Marcos é a guitarra referente e das máis solicitadas na música galega. Foi músico de Rodrigo Romaní, X.M. Budiño, Leilia, e Uxía. Realizou varios discos de música folque, rock, jazz e flamenco. O flamenco é a sua mellor forma de expresión. Punta de Cabio é o seu primeiro traballo discográfico como solista . Foi membro do místico grupo compostelán "A Psicofónica de Conxo" e comparte Marful co proxecto Narf. Pedro é o presente do diatónico galego: profesor, arreglista, compositor… Naceu en Madrid, onde se formou e entrou na música, agora vive en Compostela. Xunto ao seu irmán crearon o grupo Laio de folque-fusión e arranxaron os dous primeiros discos de X.M. Budiño. Comparte Marful co grupo Talabarte xunto a Kin García e Quim Farinha. Pablo é clarinetista , responsável xunto aos seu compañeiros dos arranxos marfulianos. Ten tocado xunto ao seu irmán Pedro con grandes músicos como: Jacky Molard (Bretaña), Soïg Siberil (Bretaña), Donal Shaw (Capercaillie), Wafir y Sabastian Rubio (Radio Tarifa), Alasdair Fraser (Escocia), Värtina (Finlandia), Tony McManus (Escocia), Mercedes Peón (Galiza), Pierre Invert (Francia), Mairin Fahy (Irlanda), Ove Larsson (Suecia), Leilía (Galiza ), Kathryn Tickell (Reino Unido), Daniel lapp (Canada), Kepa Junkera (Euskadi), Germán Díaz (Valladolid), Jaime Muñoz (La Musgaña, Castela) ,Harry Manx (Canadá), María Salgado (Castela), Uxía Senlle (Galiza)... Os dous tocan tamén con Xermán Diaz en Nuke Trio. Para máis información e contratación info@abada.es MP3 · Leverelem · Menina

 

...e tamén

Milladoiro
Faltriqueira
Sondeseu
...